मावळ, दि. १५ – मावळ तालुक्यात एक धक्कादायक घटना घडली आहे. तळेगाव दाभाडे जवळील प्रसिद्ध पर्यटनस्थळ कुंडमळा येथे इंद्रायणी नदीवर असलेला जूना पूल कोसळून दुर्घटना (Accident as old bridge over Indrayani river collapses in Kundamala ) घडली आहे. रविवार असल्याने पर्यटकांची गर्दी होती, यावेळी हा पूल कोसळून अनेक पर्यटक इंद्रायणीत बुडाल्याची भीती व्यक्त केली जात आहे.
या घटनेची माहिती मिळाल्यानंतर स्थानिक पोलीस, ग्रामस्थ आणि आपदा मित्र यांनी घटनास्थळी धाव घेतली असून बचावकार्य सुरू करण्यात आले आहे. दोन दिवसांपासून मावळ परिसरात मुसळधार पाऊस कोसळत असून इंद्रायणीच्या पाणीपातळीत वाढ झाली आहे. यामुळे नदीत पडलेल्या पर्यटकांना वाचविण्याचे शर्तीचे प्रयत्न यंत्रणांकडून सुरू आहे.
