भाजप नेत्यांनी तोंड सांभाळून बोलावे, अन्यथा फिरणे मुश्किल करू
रोहन सुरवसे-पाटील यांचा इशारा; पवार यांच्यावरील सदाभाऊ खोतांच्या वादग्रस्त वक्तव्यावर युवक काँग्रेस आक्रमक
पुणे : सांगलीतील जत येथे महायुतीच्या प्रचार सभेत भाजप नेते व आमदार सदाभाऊ खोत यांनी राष्ट्रवादी काँग्रेस (शरद पवार) पक्षाचे अध्यक्ष शरद पवार यांच्यावर पातळी सोडून टीका केल्यानंतर राज्यातील राजकारण चांगलेच तापले आहे. आमदार सदाभाऊ खोत यांचा महाविकास आघाडीच्या नेत्यांकडून व कार्यकर्त्यांकडून तीव्र निषेध केला जात आहे. महाराष्ट्र प्रदेश युवक काँग्रेसनेही आक्रमक भूमिका घेत भाजप नेत्यांनी तोंड सांभाळून बोलावे, अन्यथा फिरणे मुश्किल करू, असा थेट इशाराच दिला आहे.
युवक काँग्रेसचे प्रदेश सरचिटणीस रोहन सुरवसे-पाटील म्हणाले, “भाजपच्या नेत्यांनी इतर पक्षातील नेत्यांबाबत बोलताना तोंड सांभाळून आणि भान ठेवून बोलले पाहिजे. सदाभाऊ खोत यांना सत्तेची मस्ती चढली आहे. ज्येष्ठ नेते शरद पवार यांचा एकेरी उल्लेख करत खोत यांनी पातळी सोडून केलेली टीका महाराष्ट्राच्या राजकीय संस्कृतीला धरून नाही. महाराष्ट्राच्या जनतेला खोत यांची भाषा अजिबात आवडलेली नसून विधानसभा निवडणुकीत भाजप महायुतीला याची मोठी किंमत मोजावी लागेल. जनता भाजपला धडा शिकवल्याशिवाय राहणार नाही. उपमुख्यमंत्री अजित पवार यांनीही खोत यांना खडेबोल सुनावले असून, टीका करताना भान ठेवण्याचा इशारा दिला आहे.”
इथून पुढे महाविकास आघाडीतील कोणत्याही नेत्याबाबत जर भाजपचा कोणताही नेता पातळी सोडून, बेतालपणे वक्तव्य करेल तर आम्ही खपवून घेणार नाही. त्यांना जशास तसे उत्तर देण्यात येईल. वाचाळवीरांना भाजपच्या वरिष्ठ नेत्यांनी नीट समज द्यावी; अन्यथा त्यांचे फिरणे मुश्किल करू, असा इशाराही सुरवसे-पाटील यांनी दिला आहे.
