फार्मासिस्ट हा आरोग्य व्यवस्थेचा एक महत्वाचा आधारस्तंभ
‘एफडीए’चे सहआयुक्त गिरीश हुकारे; ‘सूर्यदत्त कॉलेज ऑफ फार्मसी’मध्ये जागतिक फार्मासिस्ट दिवस साजरा
पुणे : सूर्यदत्त एज्युकेशन फाउंडेशन संचालित सूर्यदत्त कॉलेज ऑफ फार्मसी हेल्थकेअर अँड रिसर्चमध्ये (एससीपीएचआर) जागतिक फार्मासिस्ट दिवस साजरा करण्यात आला. ‘सूर्यदत्त’चे संस्थापक अध्यक्ष प्रा. डॉ. संजय बी. चोरडिया यांच्या मार्गदर्शनाखाली उपाध्यक्षा सुषमा चोरडिया व सहयोगी उपाध्यक्षा स्नेहल नवलखा यांच्या नेतृत्वात कार्यक्रमाचे आयोजन करण्यात आले होते. आरोग्य क्षेत्रात फार्मासिस्टची महत्वपूर्ण भूमिका आणि त्याचे समर्पण याविषयी जागृतीपर कार्यक्रम उत्साहात झाला.
इंटरनॅशनल फार्मास्युटिकल फेडरेशनने जाहीर केलेल्या (एफआयपी) ‘फार्मासिस्ट : मीटिंग ग्लोबल हेल्थ नीड्स’ संकल्पनेवर आधारित या कार्यक्रमातून फार्मासिस्टचे समुपदेशन किती उपयुक्त आहे, यावर प्रकाश टाकण्यात आला. अन्न व औषध प्रशासनाचे सहआयुक्त गिरीश हुकारे यांच्या विशेष मार्गदर्शनाने पदविका व पदवीच्या विद्यार्थ्यांच्या, शिक्षकांच्या व आरोग्य क्षेत्रातील व्यावसायिकांच्या ज्ञानात भर घातली. फार्मासिस्टच्या जबाबदाऱ्या, रुग्णाची काळजी, औषधांची सुरक्षितता आणि सार्वजनिक आरोग्याचे सक्षमीकरण यावर त्यांनी मार्गदर्शन केले. फार्मासिस्ट हा आरोग्यसेवेचा एक महत्वाचा आधारस्तंभ असल्याचे ते म्हणाले.
बावधन परिसरात भव्य रॅली काढत विद्यार्थ्यांनी जागोजागी पथनाट्य सादर केले. औषधांचे विविध उपयोग आणि फार्मासिस्टचे महत्व यामधून विशद करण्यात आले. सल्लागार समितीचे सदस्य व मेंटॉर प्रसन्न पाटील यांनी विद्यार्थ्यांना फार्मासिस्टची शपथ दिली. फार्मासिस्ट दिवसाच्या निमित्ताने ई-पोस्टर, रील्स, ई-प्रश्नमंजुषा, घोषवाक्य लेखन, रांगोळी अशा विविध स्पर्धांचे आयोजन केले होते. प्राचार्य डॉ. हेमंत जैन, कार्यक्रम समन्वयक डॉ. सारिका झांबड व दीपाली कुदळे यांनी सर्व सहभागी विद्यार्थीं, शिक्षक, प्रायोजक यांच्याप्रती कृतज्ञता व्यक्त केली.
याप्रसंगी बोलताना प्रा. डॉ. संजय बी. चोरडिया म्हणाले, “डॉक्टरांच्या सल्ल्याने रुग्णाला औषधोपचार दिले जातात. मात्र, त्याचे वितरण व पुरवठा करण्याचे मोलाचे काम फार्मासिस्ट करतात. आरोग्य व्यवस्थेतील हा एक प्रमुख घटक आहे. गावखेड्यात, जिथे डॉक्टर वेळेवर उपलब्ध होत नाही, तिथे फार्मासिस्ट डॉक्टारांप्रमाणे योग्य औषधोपचार देण्याचे काम करतो. समर्पित भावनेने काम करणारे फार्मासिस्ट घडविण्यावर सूर्यदत्त संस्थेने नेहमीच भर दिला आहे.”
