सावित्रीबाई व ज्योतीबांच्या विचारांचा शंभराहून अधिक कवींनी केला जागर
पुणे: देशातील मुलींची पहिली शाळा आंतरराष्ट्रीय काव्यजागर अभियानांतर्गत आयोजित भिडेवाडा कवीसंमेलनाला उत्स्फूर्त प्रतिसाद मिळाला. भिडेवाडाकार कवी विजय वडवेराव यांच्या पुढाकारातून गंज पेठेतील ज्ञानज्योती सावित्रीबाई फुले स्मारकाच्या सभागृहात रविवारी हे कवीसंमेलन झाले. जवळपास शंभराहून अधिक फुलेप्रेमी कवींनी आपल्या रचना सादर केल्या.
पुणे, नांदेड, सातारा, सांगली, नाशिक, सोलापूर, वर्धा, अमरावती, यवतमाळ, नागपूर, कोल्हापूर, बेळगाव, अहिल्यानगर, छत्रपती संभाजीनगर, बीड, धाराशिव या जिल्ह्यातील, तसेच तेलंगणा, कर्नाटक राज्यांतून आलेल्या कवींनी या राज्याच्या विविध भागातून आलेल्या कवींनी देशातील मुलींची पहिली शाळा (भिडेवाडा) यावर अतिशय सुंदर, वैविध्यपूर्ण, प्रबोधनपर रचना सादर केल्या.
क्रांतिसूर्य महात्मा जोतीराव फुले व ज्ञानज्योती सावित्रीबाई फुले यांनी पुण्याच्या बुधवार पेठेतील भिडेवाड्यात सुरू केलेल्या देशातील मुलींच्या पहिल्या शाळेचा इतिहास जतन व्हावा, तो घराघरात पोहोचावा या उद्देशाने ‘भिडेवाडा काव्यजागर अभियान’ राबविण्यात येत आहे. या संमेलनाचे खास वैशिष्ट्य म्हणजे संमेलननात सहभागी सर्व कवयित्रींनी ज्ञानज्योती सावित्रीबाई फुले यांच्या वेशभूषेत रचना सादरीकरण केले.
साधना शेळके (पुणे), प्रतिभा कीर्तीकर्वे (पुणे), उमेश शिरगुप्पे (गोवा), मनोज भारशंकर (अबुधाबी), नंदा मघाडे (जळगाव), पूनम पाटील (जळगाव) या फुलेप्रेमी कवींना आंतरराष्ट्रीय फुलेप्रेमी समाजरत्न पुरस्कार जाहीर करण्यात आले. गुलटेकडी येथील विमलाबाई लुंकड शाळेच्या विद्यार्थ्यांनी देशातील मुलींच्या पहिल्या शाळेवर प्रबोधनपर पोवाडा सादर केला. शिक्षिका वर्षा शिंदे यांनी मार्गदर्शन केले. प्रास्ताविक विजय वडवेराव यांनी केले. सूत्रसंचालन सरिता कलढोणे, कांचन मून, तेजश्री पाटील आणि कविता काळे यांनी केले. आभार साधना शेळके यांनी मानले.
